35r [C’]est ci l’antree de la mosse commant l’an doit oir la mosse ne les ordenances qu’il afierent a faire. Premerement au commancemant de la mosse l’an doit restraindre les sans an lui que l’an ne doit panser ne regarder a chose c’an hoit ohie ne vehue. Quant li preste vient devant l’autel il doit vestir la chasule, si commance a dire son confiteor a nostre soignour et tot auci devons nos faire. Et an cele meisme ovre nos nos devons agenoillier et prier a nostre soignour que il ne regardoit nos pechiez ne nos defautes mas a la soe bonté e a son sain servise lai a faire a l’essaucement de son glorireur [sic] non e a la destruction de l’enemi e au profit de nos armes. Si devons dire nostre confiteor qui lou sait et qui ne l[ou] sait sa patre nostre et son credo por ceste grant ovre acumplir.

Aprés doit l’an [dire] .ix. fois Kyrie leison. Cenefie ix. ordres d’anges qui sont an paradis. Et de ces ordres an venent a la messe et ne mie totes les ordres mas de chascune une partie. Si devons prier a ces benois anges qui priaient Deu por nous.

Aprés dit l’an Gloria in excelsis Deo. Si devons doucement loer nostre soignour. Aprés dit li prestes les orisons et fait l’an memoire des sains et de nostre dame. Si les devons prier qui prient Deu por nos. Aprés dit l’an la priere, c’est a dire que ce est .i. messaiges qui aporte letres qui dit que 35vli sires venra, si lou devons oir mout paisiblement. Aprés chante l’an lou greil et la sequence et l’anlelme. Ce senefie que ce sont les pauveres et les misles et les violes qui vienent devant lou soignour.

Aprés dit l’an l’avangile. Ce senefie que c’est li veras messaiges qui ne mant point ne qui ne puet mantir et dit que li sires vanrai asteement. Aprés fait l’an l’oferande, si offre l’an .iii. paires d’oferandes si l’ont, a savoir li povre et li riche. Li riche offrent les riches offerandes et li povre les povres offerandes. Si devons nos povres cuers offrir a Deu que il lou face riche de sa grace.

Aprés se retorne li prestes devers nos, si nos prie que nos priains por lui quar il s’en vait an nos besoignes, si an devons mout segurosemant prier nostre soignor. Aprés dit li prestes Sursum corda, où sont nos cuers, et li c[h]ors respont an la persone de nos: Habemus ad Dominum. Sire, il sont a vous. Donc devons bien nos cueurs avoir apparoilliez que nos ne meffacens mie a Deu ne a nos p[ro]chiens an ceu respondre.

Aprés chante l’an la loange des anges: Sanctus, sanctus, qui venaient apparoillier la tauble où Dex repaist les suens amis, donc atent l’an la venue nostre soignour. Si lou devons faire auci que quant li rois vient an la cité tuit li melade li venent a l’ancontre, si li mostrent lor plus grant meladies por miaz recovrer. Ensi devons nos faire. Et mout est couars qui ne si ose aparor quar il hi vient por .iii. choses: por doner sa grace, et por pardoner nos pechiez, et por traire les armes de purgatore.

Aprés vient la patre nostre. Si devons prier a Deu que il nos soit peres parmenaubles et que nos ne puissons mantir en lui appaler ‘pere’ et que sa bone velonté soit faite 36r an nos, et si devons pardoner a touz ceaux qui nos hont meffait.

Aprés dit l’an .iii. fois Agnus Dei. Ce sont iii pais que nos requerons a nostre soignour. ‘Sire, faites pais antre nos et nos pardonez nos mautalans’. ‘Sire, faitez pais antre moi et mes proismes que oes a meschie por nos et an nos’. ‘Sire, faitez pais antre moi et moi, c’est a dire antre moi et mon cors que li cors obeisse a l’arme et que l’arme face vostre sainte velonté’. E a la trinité doit l’an requerre .iii. choses: au pere puissance -- si com il est toz puissans -- qui nos doint puissance de destrure pechié et d’acroistre vertuz; e au fil sapiance -- si com il ot lou tresour de science et de sapience an son tresor repuns -- qu’il nos doint science et sapience de vivre en cest siegle a la sue honor e a l’esdeifiemant de nos proismes, au profit de nos armes; et au saint esperit monstrer nos pereceuse volantez de bien faire qu’il descende en nos si comme il fist es apostres au jour de Pentecoste que il eschaufoit nos cuers e ambrasoit nos desierrers a Deu loer e amer.

Aprés convoions nostre soignour en ces chans que l’an recommance aprés la pais. Si lou devons mout humblemant loer de sa douce presance, de ses douz biens que il nos fait et li devons prier que il ne nos obliot mie, ses orphenins. Aprés fait l’an les derrieres orisons et fait l’an memore des sains et de nostre dame. Si les devons prier qu’il faceient nos besoignes a nostre soignour asteemant. Et qui ansic lou fait, je croi que il hot bien la mosse. Explicit.