Pour les besongnes temporeilz.

Si tost com il auerait ce dit en son lit meisme se doit pourpenseir ententivement queil choze il devrait faire a cellui jour de besongne et porrait pour lui et pour aultrui ou en commun dou pays profitier tant com a lui en affiert. Et doit choxir et crieir a son pooir tous les millours et asseoir et affermeir en son cuer la maniere pour quoi il deverait esploitier et dire par .iij. fois pour mieulz savoir et retenir.

Ce que li persone doit faire au matin.

Et puis quant on se lievet au matin doit on faire .iiij. chozes qui sont general chascun jour, dont les .ij. sont de l’arme, et la tierce dou corps, et la .iiij. de chevance. La premiere est d’aleir au moustier et oyr lou servise de nostre Signeur dignement et faire orison teile c’on la sceit et doit on avoir lou cuer a Deu parfaitement. La .ij. est de fair aumones selonc lui queiles qu’elles soient, grandes ou petites, se ce n’estoit tant soulement que de .i. denier et senz penre nulle vaine gloire.

Ce que li persone doit faire quant il est revenu de l’esglise.

Si persone doit aleir en son hostel quant il ait oye messe et mettre aucun conroi en lui et amendement, se ce n’estoit que rongnier ses ungles. Et puis se doit pourveoir d’aucune chevance selonc ce que mestier li est, ou de faire aucun amendement en son hosteil et en sa terre qu’il ait ou en aucuns affaire selonc ce que on est. Et trestout ceci doit estre parfait au matin.

Aprés doit on vigorousement entendre et senz delai au chozes qui on ait assizes en son cuer et pensees ains que on se levast de son lit et auz aultres Folio 83va que puis sont avenues par accidant, se elles sunt hastives, se aucunes en y ait. La plus courte voie qui soit a delivrance si est que on entende a faire sens peresse, car en faisant parfait on, et en chassant ataint on, et qui ataint si prant. Et qui puet panre et il respite jusques a londemain, teil choze puet avenir que jamais ni ataindrait, et teil se cuide espargnier qui s’encombre et avient a ceaulz qui dient une altre fois il attendrait. Et teilz y ait qui dient : ‘je commanderai a cellui qui face teil choze’, et quant elle est mal faite, si s’en corroucent et ensi demourent encombreiz longement.

Et avient alcune fois que on met tant de besongnes l’une sus l’aultre que on laist a faire les unes pour les aultres pour les cherges que on y voit a faire, et s’en laist plusours a faire par obliance. Et en est on acune fois si entrapeiz que on ne sceit a laqueile on doit commencier, et se on les eust faites a l’ore qu’elles cheoient, on les eust mieulz faites et plus aaize et mieulz asseviez et a moins de courrous. Lucans dit que quant Jullius Cesar entreprenoit une choze a faire, ne cuidoit riens avoir fait tant com il avoit riens a faire. De tout ce que on ait a faire en .i. jour doit on avoir fait en demi jour. Et se on ne puet tout faire, si l’on doit on commandeir a faire par ses maisnies et regardeir comment il l’ont faite.

Ausi on doit chastieir et adrecieir les enfans a bien faire et a Deu servir et aleir volentiers en l’esglize et a estre de belle maniere.

C’est ce que on doit faire aprés maingier.

Car aprés ce c’on ait but et maingiet doit on reposeir une hore. Et aprés ce se doit on delitier en aucune choze por avoir lou monde et pour avoir repoz en son cuer et lui aaisier senz pechieit et sen honte.

C’est ce c’on doit faire a la vespree.

On doit estre a la vespree entre les gens pour veoir, oyr, et apanre, et dire aucuns biens selonc ce que Deux lour ait donnei de graice. Et la nuit se doit reposer jusques a la mie nuit.

De ceulz qui ne doient mie tenir ceste ordenance.

Ceste devise n’est pas faite pour les labourous, ne pour les povres gens le mestier qui pour lou vivre lour font aultrement par estevoir, ne pour altre qui par destresse de signour lou font aultrement pour commandement dou servaige, ne au gens de penance ne a ciaulz qui par lou commandement ou establissement de sainte esglize lou font aultrement.