Mirra.

Et m’est avis que le prumier arbre qu’il vous fault planter, c’est l’arbre de mirre. C’est arbre ycy porte ung arbre qui est amer au commencement, mais aprés il est fruit tres doulx et delectable. C’est arbre, dy je, de mirre porte le fruit de penitence par contricion, confession, et satisfacion de ses peches. C’est la premiere que doit fere ung jeune homme ou ungne jone femme quant il vienntte a conversion que bien laver leurs conscience par contricion, confession et desplaisance de leu‵rs′ peches. Car in confessione omnia lavantur. Et doitt [on] tres bien et diligamment recogitare omnes annos suos in amar[i]tudine anime sue. Et lors il porront dire: Domine, si sic vivitur et in talibus vita spiritus mei. N’est pas Folio 125r aussi a oublier que le fruit de ceste arbre-cy selon sa proprieté garde tout le corps de nos operacions, affeccions, entencions: ut destruat corpus peccati, de corrupcion de peché et a vermibus viciorum. Car penitence est descripte que c’est doleur des peches perpetres et ferme propos de non rencheoir james, afin quod non regnet peccatum amplius in nostro mortali corpore, ut obediamus concupiscenciis ejus. ¶ Cest arbre est de tous poins necessaire, car tous les aultres arbres sans cestuy seroient de nul profit.

Arbor vite

Le second arbre que aves a planter est l’arbre de vie, et est dit arbre de vie car il porte le fruict par lequel l’ame vit en Dieu. C’est assavoir le fruict de devocion, charité et dilettion. ¶ Devocion est ascensus mentis in Deum per pium et humilem affectum. Et ainsi que l’ame donne vie au corps, ainsi fait charité a l’ame. Et affin que puisses monter en Dieu petit a petit selon la descripcion de devocion, vous aves a penser Folio 125v les benefices de vostre createur. Et prummierement le benefice de creacion: c’est qu’il vous a fait a sa samblance. C’est gran[t] dignité d’estre fait a la semblance de Dieu. Il ne vous a pas fait une creature insensible, une pierre ou ung arbre; ne une beste mue, asne ou cheval, ou chat ou chien. ¶ Mais vous a fait capable de raison. Et par consequent s’a vous ne tient participable de beatitude pardurable.

Vous deves aussi considerer le benefice de redempcion. C’est que pour vous rache[ter] des paines d’enfer là où vous esties a tousjours comdempnes, il a volu souffrir mort et passion. ¶ Vous l’aves aussi a remercier qu’il vous a volu naistre en sa foy qu’il n’a pas concedé a plus de ung million de Sara[s]ins lesques sont en peril de pardurable dampnacion par defaulte de foy et de baptesme, quia nisi quis regnatus [sic] fuerit ex aqua et spiritu sancto non potest introire in regnum celorum,c’est nostre foy.

¶ Vous l’aves aussi a Folio 126r remercier de la pacience qu’il a eu en vos peches qu’il ne vous a pas puny tantost comme il a fait pluseurs autres (ausquels il n’a donné ne temps ne heure d’eulx repentir, mais les a tantos precipites en enfer), ains a attendu que vous repentissies et convertissies affin que ne fuissies dampnee. Ne ssitis, se dist l’apostre,quia paciencia Dei ad penitenciam te adducit.

¶ Vous l’aves aussi a remercier que il vous a donné ceste bonne volenté et cogitacion. Il n’est nulle doubte que elle ne vient pas de vous, quia non sumus sufficientes cogitare quid a nobis sed sufficiencia nostra a Deo est. Ce n’est pas aussi petit don que bonne volenté. Que proffiteroient les autres sans elle? Gloria in excelsis Deo et in terra pax hominibus bone voluntatis, ce dit l’escriture. Et en especial vous l’aves a remercier qu’il vous a donné grace de venir en religion et estre de ceulx qui sont deputes especialement a son service où vous le poves servir pa`i´siblement et sans soing quelconque Folio 126vet faire vostre sauvement bien legeremen[t] se en vous ne tient.

Le pommier d’obed[ience].

¶ L’autre arbre que vous aves a planter, c’est le pommier d’obedience. Cest arbre port[e] fruict de discrecion et de science de bien et de mal, et n’est pas celui qui fut deffendu a Adam, comme dit l’escriture. De ligno au[tem] sciencie boni et mali ne comedas: in quocumque die comederis morte morieris. ¶ Mais de cestuy est le contraire, car qui n’en meng[era] il morra esperituellement, Ponendo bonum malum et malum bonum, en faisant de vice vertu et de vertu vice. ¶ A ce fruit ycy comparer nous admonneste instaument Salomon en ses paraboles. ¶ La tradicion des sains peres est que on ne peut venir a discretion senon par obedience et volentiers croire conseil. ¶ Un[g] religieux ou religieuse, quant il veulete user de leur taittes ne seront ja sages et ne vendront ja a perfeccion, car pluseurs en sont peris et venus a male fin.

¶ Un[g] Folio 127renfant qui est soubz ung maistre pour aprendre aucun art, s’il n’obeist a son maistre, james ne vendra de son art a la science. Ce fruit ycy vous aprendra a vivre sobrie et juste, pie -- pie envers Dieu, juste envers vostre prochain, et sobrie en vous mesmes. Il vous aprendra aussi a cognoistre les temptacions de l’ennemy qui est une chose moult necessaire a une personne qui veust Dieu servir et que porra dire cum apostolo: Non enim ignoramus cogitaciones ejus.

Cest arbre doncques est moult necessaire en vostre jardin qui porte le fruict par lequel on se scet conduire in via mortua, et sans lequel on ne peut venir a bien ne a perfeccion, mimmement selon la sentensse de monsieur saint Anthoine quant les bons peres eurete disputacion par laquelle vertu on venoit plus tost a perfeccium, et l’un disoit par juner, l’autre disoit par veillier. Mais saint Anthoine disoit par discrecium en toutes choses. Et fut sa sentence mou[l]t approuvee de tous.

Le poirier

L’autre arbre que aves a planter, c’est le poirier de chasteté. Cest arbre cy porte le fruit honorit ex honestis. Nous veons en sainte eglise que p[uis] que ung chanonne garde chasteté, quelque autre chose qu’il face, chascun l’a en honeur et reverence, et dit on que c’est ung saint homme. Il porte aussi le fruict de toute honnesteté, netteté, et pureté. O que plaisant et souef, odorant, est a nostre sig[neur] ce fruit ycy, n’est riens plus certain. On peut bien dire de luy: Bonus odor est Deo et angelis et hominibus. C’est aussi odor vite in vitam. Cest arbre est necessaire au jardin de ung religieux ou religieuse, auttrement y ne sont point agreables a nostre seigneur.

Le figuier.

L’autre que aves a planter est le figu[ier] de povreté. Cest arbre ycy est lait a veoir comme ung figuier qui est communement bossu et tortu, mais toutesvoies il porte tres bon fruit que on Folio 128r peust appeller mundi contemptum. Car ung vray povre de cuer ne tient compte d’office ne de dignité. Il ne tient compte d’or ne d’argent, ne de pierres precieuses, ne de precieux vestemens, ains est content de toute abjeccion, vilité et extremité, et a brief omnia arbitratur ut stercora ut Christum lucrifaciat. Il dit avec le sage: Vanitas vanitatum [e]t omnia vanitas. Et aussi omnis caro fenum, et omnis gloria ejus tanquam flos feni.

Ce fruit ycy est moult pla`i´sant a Dieu. C’est celui duquel y soit communement quant il estoit en ce monde, car il volu toujours estre en povreté, en vilité, en abjeccion, et en extremité. Ce est doncques moult necessaire en vostre jardin.

L’amandier.

L’autre arbre que aves a planter en vostre jardin, c’est l’amandier. Cest arbre porte le fruit dont on fait l’ui[l]e de misericorde, car il vous fault estre piteux et misericors a toutes gens. Ce fruit Folio 128vycy est propre a nostre signeur, quia sibi proprium est misereri semper, et parcere miseraciones ejus super omnia opera ejus. Et veult que nous le ensivons et que aions pitié, non pas seulement de nos amis, mais aussi de nos ennemis: Benefaci[te] hiis qui vos oderunt et orate pro persequentib[us] et calumpniantibus vos, ut sitis filii patris vestri qui solem suum facit oriri super bonos et malos, et pluit super justos et injustos. Et si esurierit in te inimicus tuus ciba ill[um], et si sitit potum da illi. Ceste erbe ycy embellira moult vostre ja[r]din, car sus les autres il est plaisant a nostre signeur, et bien plaisant quant ceulx qui l’ont et en usete. Il son[t] filz de Dieu.

La vigne de humillité.

Or la gré de Dieu nous arons tantost ung biau jardin, mais il ne fault pas oublier la vigne de humilité. Une vigne est basse et ne monte point en hault comme font les autres arbres. Ainsi fait humilité, elle va toujours par bas. Folio 129r Ossi elle porte tres precieux fruit, car elle porte le roisin dont on fait le vin de sapience, quia ubi humilitas, ibi sapiencia. Ce fruit ycy ayme moult nostre signeur, car il est escrit quod neminem diligit Deus, nisi eum cum quo sapiencia inhabitat. Pluseurs autres arbres a et doit avoir en ce jardin, mais il doit souffire a tant ycy.

L’iaue pour arrouser le jardin.

Nous avons souffisaument planté, ce cuyde je, nostre jardin. Mais il est de necessité de l’a`r´rouser, car il est dit dessus: Rigabo ortum meum et [c]. Autrement par trop le laissier secher, il porroit faillir a porter fruit. Et si ne le fault pas arrouser de toutes eaues, mais seulement de l’eaue de la fontaine de la sainte escriture. Ceste fontaine est fons signatus digito Dei, car elle est inspiree du saint esperit. C’est fons ortorum, puteus aquarum vivencium. C’est l’eaue de laquelle il est escript, Super aquam refeccionis educavit me: animam meam convertit. Deduxit etc. L’arbre qui sera planté sur le ruisseau de Folio 129vceste fontaine ne fauldra point a porter fructum in tempore suo. C’est l’eau de laq[uelle] dist nostre signeur: Qui biberit ex hac aqua non siciet umquam, sed fiet in eo fons aq[ue] salientis in vitam eternam. Aussi j’ente[ns] par la sainte escripture, non pas tant seulement les livres de la bible, mais aussi le[s] traitties des sains docteurs, comme saint Augustin, saint Gregores, et aultres sans nombre qui par l’inspiracion du saint esperit on fait moult de bonnes escrip[tures] et baillié moult de saintes doctrin[es].

Et cecy apert de mon signeur saint Augustin par la vision qui apparu a saint Bernard luy estant a matines. Il s’endormit ung peu ainsi comme on disoit unes lectons de saint Augustin, et sambla a saint Bernard qu’il vit ung jone homme de cujus ore il issoit ung grant fleuve q[ui] remplissoit et arrousoit toute l’eglise. ¶ P[ierre] aussi, disciple de saint Gregoires, tesmoing[na] qu’il avoit veu souvent le saint esperit Folio 130r en samblance de ung coloms sur la teste saint Gregoire quant il ditoit ses livres. ¶ Ce sont ycy fontes salvatoris desquelz il fault haurire in gaudio. ¶ Ce sont ycy bonnes fontaines, non pas cisternes veteres non valentes continere aquas -- c’est a savoir les escritures et doctrines des payens esquelles il n’a point de doulceur et tres pau d’edificacion. Et par ce elles ne sont pas utiles a arouser nostre jardin. ¶ Et de ceste fontaine et de ceste eaue ycy il vous fault tres souvent arrouser vostre jardin, afin que tres habundaument il puist porter fruit.

La cloture.

Or est nostre jardin planté et arrousé, mais encores fault il ung point. C’est qui le fault clo`r´re, car il est escript ortus conclusus, soror nostra sponsa, ortus conclusus. Et est a noter qu’il met deux fois conclusus. Il y faut murus, scilicet haulte muraille, † ante-murale. Il fault doncques qu’il soit deux fois clos. Folio 130vC’est a savoir par garder et tenir en discipl[ine] ses sens, non pas tant seulement exterie[urs] lesquelles chascun cognoist, mais aussi interie[urs] qui sont imaginacion, memore, volun[té], raison, et entendement ou consentement, afin que les larrons n’entrent au ja[rdin] de nostre ame qu’ilz ne robent e[t] ne emblent le fruit d’icelui. Apprehendi[te] disciplinam, ce dit le prophete, nequando irascatur Dominus et periacis de via justa par qu[oi] vous perderies le fruit de vostre jardin. C’[est] ycy paradisus deliciarum quam plantavit Dominus ab inicio et posuit in ea hominem ut operaret et custodiret illam. Il le fault doncques bien labourer et aveucques ce tres bien garder et clore.

Pulcritudo orti.

Encores y a une chose qui moult recommand[e] nostre jardin. C’est que nostre signeur aprés sa [vie?] et passion fut ensevelis ou jardin, ainsi que monsiour saint Jehan l’evvangelis[te] recite: O vous benoit et bieneureux, se en vostre jardin nostre signeur est ensevelis par Folio 131r tres grant amour et dileccion et continuelle memoire et meditacion de sa vie et conversacion, mort et passion, resurreccion, et ascencion, et les aultres misteres, a laquelle chose il vous fault souvrainement labourer.

Maintenant porres vous inviter nostre signeur a visiter vostre jardin en disant: Veniat dilectus meus in ortum suum ut commedat fructus pomorum suorum. Mais sans inviter il le visitera tres volentiers. Et saches qu’il n’est riens qui luy soit plus agreable, plus plaisant ne plus souef odorant que ung tel jardin. Car luy mesmes dit: delicie mee esse cum filiis hominum. Et ainsi comme ung homme charnel se delitte d’estre en ung jardin materiel, ainsi fait nostre signeur en ung tel jardin esperituel, et encores plus sans comparison.

Aprés que ares ainsi labouré vostre jardin et vostre terre, vous porres edifier vostre maison, car sapiens primo laborat agrum suum et postea edificat Folio 131v domum suam. Ceste maison est la maison de pardurable mansion en paradis: In celo empireo ubi Christus regnat in secula seculorum, et a laquelle Dieu par la grace nous veulle mener. Amen, quia non habemus hic civitatem manentem sed futuram inquirimus.